استثمري في شخصيتك

عزيزتي ،
ميسالش تقوم نهار بكري و تخرج تعمل جرية موش لازم grasse matinée و برانش كل ويكاند .
ميسالش تعمل فرشك و تلم الطاولة بعد ما تفطر .
ميسالش تعاون أمك و تنقص من المصروف على بوك و تبوسهم و تعنقهم و توسع بالك معاهم .
ميسالش تقري خواتك و تنصحهم كي يستحقوك و ميسالش تخليهم يلبسو معاك و تلبس معاهم .
ميسالش تاخو خبز و حليب و زيت زيتون في الصباح في عوض croissant و pain au chocolat، أقل كوليستيرول و أكثر منفعة و موش باش يقول عليك حد "gديمة " .
ميسالش مرتين ولا تلاثة في الجمعة تخلي شعرك طبيعي بلاش brushing و ميسالش تخليه curly بلاش كيراتين . 
ميسالش تمشي تخدم و إنتي موش عاملة fond de teint و موش عاملة eyeliner. 
ميسالش وجهك يتنفس شوية و مساماتك تتنعوش . راهم المكياجات الكل مواد سامة و كيميائية. 
ميسالش تمشي تخدم بنفس المريول الي لبستو عندك نهارين و ميسالش ما يبدا عندك حتى سباط talon . راحتك ما تشتراش بالفلوس .
ميسالش ما يبداوش عندك faux ongles و ميسالش ماتبداش عاملة vernis permanent. 
موش عيب كان ما عندك حتى تصويرة في الinstagram فيها صوابع ساقيك .
ميسالش فلوسك الكل تحطها في كتب و تشري حوايج من الfripe و ميسالش في عوض تعمل pédicure تمشي تتصدق بيهم كال50 دينار ولا تعاون بيهم جمعيات.
موش لازم يبدا عندك les must have الكل ، و موش لازم ساك لويس فيتون ب 3000 دينار باش تحس روحك كلاس و présentable.
ميسالش كي تبدا في وسيلة نقل ولا تستنا في salle d'attente و لا تستنا في عبد تجبد تقرى كتاب في عوض تتفرج في امينة مينوش و الجزرة فطومة في الinstagram . 
موش عيب راهو كي تتفاهم مع عبد على وقت باش تتقابلو فيه تحظر و تمشي في الوقت ( حتى كان انتي تركح فيه اكا العبد 😉 ) . La ponctualité ما تنقصش من الأنوثة متاعك. 
ميسالش كي تلقى كاغط في الشارع ولا في الكلية و تهز طيشو، حتى كان موش تابعك ، و ميسالش كعبة الpapier mouchoir متاعك تحطها في مكتوبك في انتظار تعرضك سلة نفايات ، راهو ما يتعدالك حتى مرض .
ميسالش كان عبد في الشارع فدلك معاك ولا عملك ملاحظة برباية مثلا : محلاك ، ولا تبارك الله عليك ، ولا حاجة محترمة هكاك تتبسملو و تقلو merci , و كي تدخل لعطار تقلو صباح الخير و بالسلامة ،
موش لازم تبدا كاشة كالبومة ، و زادة كان عبد قلقك عندك حق الرد .
ميسالش كي تشتها glace و شكلاطة و بيتزا تاكل على روحك ماغير ما تخمم قداش من gramme باش تزيد خاتر موش قاعد يعس عليك حد و كل واحد حر في بدنو .
ميسالش عندك كرش و ميسالش ما تلبسش taille 36 و ميسالش عندك des vergetures و ميسالش موش ديما épilée و ميسالش عندك شوية شلاغم و ميسالش تبدى عندك تجاعيد و شعر أبيض ، كل عمر و عندو son charme .
ميسالش ما عندكش iPhone و موش عيب كي تحط تصويرة و يجيوك كان 3 جام ، ما فمة حتى عبد قادر على انو يحددلك قيمتك .
ميسالش تخرج مع صاحباتك بنات و حدكم و ماغير ما تجيب خطيييبك للخرجة .
ميسالش تبدا célibataire و صاحباتك الكل عرسو و بصغارهم . موش لازمك راجل تتفوخر بيه و موش لازم تكون مرتبطة باش تكون فرحانة .
ميسالش كي تخرج تمشي تعمل دورة وحدك على ساقيك ولا تعدي عشوية في مكتبة تتصفح في الكتب ولا تتفرج في مسرحية و تعمل قهوة و تقرا حاجة وحدك مع روحك ، ما تستحقش ديما مرافق ولا مرافقة.
ميسالش كان تعدي نهار ماغير تقطيع و ترييش و تحكي في موضوع هادف موش كان ماكياج و حوايج و فلوس و أولاد و كراهب و مسلسلات تركية . 
ميسالش تبدى موش متفرجة في حتى مسلسل من إخراج سامي الفهري و ميسالش تبدى ما تحبش نوفل و ميسالش كان بعلوش ما يضحككش .
ميسالش تبدى ضد سياسة الحكومة و ضد المجتمع الي نعيشو فيه و ميسالش تلبس إلي تحب عليه و ترتاح فيه . و ميسالش يبدا عندك رأي مختلف و ميسالش تعبر على رأيك بطريقة حضارية. 
ميسالش تقول لا و تشد صحيح و ما تتنازلش على حقك .
ميسالش يبدا عندك مرض و تبدى تعدي عند interniste و لا عند طبيب نفسي و ميسالش كان diabétiqueو ميسالش كان عملت عملية قبل و عندك cicatrice ، و ميسالش كان عندك acné و ميسالش تحب روحك كيف ما إنتي و عندك ألف حق تكون فخورة بروحك خاترك حربية و قوية و شجاعة ..
موش لازم تتقوى على بدنك و على مكتوبك و موش لازم تتوافق مع معايير المجتمع و الرجال باش تحس روحك مرا و موش لازم تسيب الحماقة باش تغري درا شكون .
ميسالش تكون كيف ما إنتي و ما تقلد حتى عبد و ميسالش تكون متثقفة و ذكية و عندك برشا طموح و مزيانة بطريقة طبيعية و تكون مرتاحة dans ta peau .. 
حتى واحد ما عندو الحق ينقصلك من قيمتك دون أن تسمحي له و المظاهر زائلة و الشخصية هي أحلى حاجة في العبد . 
إستثمري في شخصيتك !